ဇူလိုင် ၂၄ ၊ ၂၀၂၅
GG (VOM)
ကရင်ပြည်နယ် ၊ မြဝတီမြို့မှာ သောင်ရင်းမြစ်ရေဆက်တိုက်မြင့်တက်လာပြီး စိုးရိမ်ရေမှတ်ထက် ၁၁ ပေကျော်လွန်လာတာကြောင့် အနိမ့်ပိုင်းရပ်ကွက်ရှိ နေအိမ်တွေ ရေနစ်မြုပ်မှုဖြစ်ပွားနေတယ်လို့ ဒေသခံတွေဆီကသိရပါတယ်။
ထိုင်း – မြန်မာနယ်စပ် မြဝတီမြို့မှာ ပြီးခဲ့တဲ့ရက်ပိုင်းကတည်းကညမိုးဆက်တိုက်ရွာသွန်းတဲ့အခြေအနေကြောင့် သောင်ရင်းမြစ်ရေ တိုးလာကာ မြစ်ကမ်းဘေးက အနိမ့်ပိုင်းရပ်ကွက်တွေအပြင်မြို့တွင်းမှာပါ ရေကြီးနစ်မြုပ်မှုတွေဖြစ်ပွားနေတာဖြစ်တယ်လို့သိရပါတယ်။
” ရေက ခုမနက်ပိုင်းတင်ကို ထပ်တိုးနေတာ။အနိမ့်ပိုင်းကအိမ်တွေဆို နှစ်ထပ်အိမ်တွေမှာအောက်ထပ်တွေမြုပ်ကုန်ပြီ။တချို့တထပ်အိမ်တွေဆိုခေါင်မိုးထိကုန်တယ်။မနှစ်က ၂၀၂၄ ရေကြီးမှုစံချိန်ကိုရောက်နေပြီ။ရေထပ်မတက်ဖို့ပဲဆုတောင်းတယ်။အခုတော့ မိုးမရွာဘူး။ ” လို့ မြဝတီဒေသခံကပြောပါတယ်။
လက်ရှိ အဓိက ရေကြီးနစ်မြုပ်မှုဖြစ်ပွားနေတာက သဲပုံဂိတ် ၊ အမှတ်၂ ရပ်ကွက် ၊ အမှတ် ၅ ၊ အမှတ် ၁ ဖြစ်ပြီး ကျန်တဲ့ ချစ်ကြည့ရေးတံတား အမှတ် ၁ ထိပ်လမ်း စတဲ့ မြို့တွင်းအနိမ့်ပိုင်းနေရာအားလုံးမှာ ရေဝင်ရောက်မှုရှိနေပြီဖြစ်တယ်လို့သိရပါတယ်။
ရေနစ်မြုပ်မှုဖြစ်ပွားပြီး နေထိုင်ဖို့ခက်တဲ့ ရေဘေးသင့်ပြည်သူတွေကိုတော့ ရေဘေးလွတ်ရာ ဘုန်းကြီးကျောင်း နဲ့စာသင်ကျောင်းငါးခုမှာ ရေဘေးကယ်ဆယ်ရေး စခန်းဖွင့်ပေးထားတယ်လို့သိရပါတယ်။
” အနိမ့်ပိုင်းအကုန်လုံးပြောင်းရွှေ့နေရတယ်။ သဲပုံဂိတ်လိုနေရာတွေ အမှတ် ၂ ၊အမှတ် ၅ ကတော့ပြောင်းရွှေ့နေရတယ်။ မိုးကအရင်ရက်ကတအားသည်းတာ။အနိမ့်ပိုင်းအိမ်တွေတော့မြုပ်တာပေါ့။” ဒေသခံနောက်တယောက်ကပြောပါတယ်။
သောင်ရင်းမြစ်ရေဟာ မနက် ၆ နာရီတိုင်းတာမှုတုန်းက ၁၂၅၁ စင်တီမီတာရှိပြီး မနက် ၈ နာရီတိုင်းတာမှုမှာတော့ ၁၃၀၃ စင်တီမီတာအထိ မြင့်တက်လာတာဖြစ်ကြောင်းနဲ့ လာမယ့် ၂၄ နာရီအတွင်းမှာလည်း စိုးရိမ်ရေမှတ်ထက် ၃ ပေခန့်ထပ်မံမြင့်တက်လာနိုင်သေးတယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားတယ်။
သောင်ရင်းမြစ်ရေက စိုးရိမ်ရေမှတ် အထက်မှာဆက်ရှိနေမှာဖြစ်လို့ မြဝတီမြို့ မြစ်ကမ်း ဘေး ၊ အနိမ့်ပိုင်း နေထိုင်သူတွေအနေနဲ့ ရေဘေးလွတ်ရာကို ရှောင်ကြဖို့လည်းသတိပေးထားပါတယ်။
ပြီးခဲ့တဲ့ ၂၀၂၄ ခုနှစ် ဇူလိုင်လနဲ့ စက်တင်ဘာလတုန်းကလည်း မြဝတီမှာ သောင်ရင်းမြစ်ရေ မြင့်တက်လာမှုကြောင့်ရေကြီးနစ်မြုပ်မှုဖြစ်ပွားခဲ့ပြီး လူသေဆုံး တဲ့အထိပင်ရှိခဲ့ပါတယ်။
ဓာတ်ပုံ – ဒေသခံ
